Əl-Kəhf ‏ surəsi - 42-ci Ayə

Surə 18

Ayə 42

Azərbaycan dilində tərcümə

(Nəhayət o, qəzəbə düçar oldu) və meyvələri məhv oldu. Beləliklə, bağın divarları tənək çardaqlarının üstünə uçmuş halda, onun yolunda xərclədiklərinə görə (təəssüfdən) ovuclarını ovuşdurur və (elə hey) deyirdi: «Kaş heç kəsi öz Rəbbimə şərik qoşmayaydım (vay olsun mənə ki, qəflət üzündən özümü və zahiri səbəbləri Allahdan daha təsirli hesab etdim)!»

Tam Surə

Əl-Kəhf ‏ surəsi 42-ci Ayəsinin Təfsirləri

NUR TƏFSİRİ: Əl-Kəhf ‏ surəsi / ayə 42

MÖHSÜN QƏRAƏTİ

26.03.2026

"Onun bar-bəhrəsi (ilahi qəzəblə) əhatə oldu. Elə bir hala düşdü ki, bağa qoyduğu xərclərə xatir (həsrətdən) iki əlini bir-birinə çəkdi. Halbuki onun (bağın) dayaqları uçulub tökülmüşdü. O deyirdi: "Kaş ki, kimsəni Rəbbimə şərik qoşmayaydım.”

Nöqtələr

Bəziləri təkəbbür göstərib malına güvənməklə Allahdan qəflətdə qalır və tövhid mehvərindən çıxıb müşrik olur. Amma istər möminlər, istərsə də kafirlər nə vaxtsa Allah qarşısında etiraf etməli olur.("Yunus”, 24; "Hədid”, 20. )

Bildirişlər

1. Allah əhatə edəndir ("Mühit”) Onun həm lütfü, həm də qəhr-qəzəbi əhatəlidir.("Təfsire-bürhan”. "Bihar”, c. 74, s. 108; "Təfsire-Nurus-səqəleyn”. )

2. Allahın cəzası qürrələnənlərin pusqusundadır.

3. Allahın bəlaları və əzabları öz pis düşüncə və əməllərimizin nəticəsidir. Bağ sahibi haqqında danışılarkən əvvəlcə onun küfrü, sonra ilahi bəla qeyd olunur.

4. Ümidsizliklər və daxili hallar insanın zahirində və rəftarlarında əsər qoyur.

5. Dünyapərəstlər hadisələrə münasibətdə öncə iqtisadi, sonra mənəvi təhlil edirlər. Onlar öncə düşdükləri zərərə görə həsrət çəkir, sonra şirklərinə görə peşman olurlar.

6. Dünyada əzablar yatmış vicdanların və qəflətdə olan qəlblərin oyanış səbəbidir.